भारताचे पंतप्रधान नरेंद्र मोदी यांनी अमेरिकेत डोनाल्ड ट्रम्प यांची भेट घेतली. या भेटी दरम्यान अनेक महत्त्वाच्या मुद्दांवर चर्चा करण्यात आली. त्यात बांगलादेशातील सध्याच्या परिस्थितीवर भारताने चिंता व्यक्त केली आहे. शेख हसीना यांना सत्तापदावरून दूर केल्यानंतर युनूस यांच्या नेतृत्वाखाली नवीन सरकार बांगलादेशात स्थापन झाले. मात्र त्यांनी भारताच्या विरोधात अनेक भूमिका घेतल्या आहेत. मोदी ट्रम्प यांच्या बैठकीत हा विषय येणे विशेष आहे कारण बांगलादेशातील झालेल्या सत्तांतरामध्ये अमेरिकेच्या डीप स्टेट ने महत्त्वाची भूमिका घेतली असू शकते.
परराष्ट्र सचिव विक्रम मिस्त्री यांनी सांगितले की पंतप्रधान नरेंद्र मोदी यांनी बांगलादेशातील अलीकडच्या घटनांवर चिंता व्यक्त केली तसेच त्याबद्दल ट्रम्प यांना माहिती दिली. बांगलादेशातील स्थिती ही दोन्ही देशांच्या प्रमुखांसाठी चिंतेचा विषय होता.
डीप स्टेटची भूमिका नाही, भारताला फ्री हँड
अमेरिकेने सांगितले यामध्ये कोणतीही भूमिका नाही. मोदी यांच्याशी भेटीपूर्वी ट्रम्प यांना बांगलादेश सत्तांतर आणि डीप स्टेट यांच्याविषयी विचारले होते. त्यावेळी त्यांनी उत्तर दिले होते की गेल्यावर्षी बांगलादेशात झालेल्या सत्तांतरात अमेरिकाचा कोणताही हात नाही. आमच्या डीप स्टेटची ही कोणतीही भूमिका नाही. ते पुढे म्हणाले की बांगलादेशास पीएम मोदींवर सोडून देत आहे. या वक्तव्याने ट्रम्प यांनी स्पष्ट केले की भारत बांगलादेशबाबत निर्णय घेऊ शकतो. त्यामुळे भारत बांगलादेशाच्या विरोधी भूमिकेला चोख प्रत्यूतर देऊ शकतो.
बांगलादेशी नागरिकांची व्हाईट हाऊसबाहेर निदर्शन
गुरुवारी बांगलादेशी नागरिकांनी व्हाईट हाऊसजवळ निदर्शन केले. बांगलादेशी निदर्शकांनी मुहम्मद युनूस यांच्या ‘असंवैधानिक’ राजवटीचा अंत करण्याची मागणी केली. हा निषेध हा अवामी लीग आणि त्यांच्या सहयोगी संघटनांनी आयोजित केले होते. तेथील अल्पसंख्याकांना संरक्षण देण्याची मागणीही निदर्शकांनी केली. बांगलादेशच्या लोकसंख्येच्या आठ टक्के हिंदू आहेत. पण शेख हसीना देश सोडून गेल्यानंतर, कट्टरपंथी सतत हिंदूंना लक्ष्य करत आहेत.
डीप स्टेट काय?
केंब्रिज डिक्शनरीनुसार, डीप स्टेट हा एक गट आहे जो लोकशाही पद्धतीने निवडून न येता आपल्या विशेष हितसंबंधांची पूर्तता करण्यासाठी आणि त्यांचे संरक्षण करण्यासाठी आणि देशावर राज्य करण्यासाठी गुप्तपणे काम करतो.
